Napulitana

Uocchie de suonno, nire, appassiunate,
ca de lu mmele la ducezza avite,
pecchè, cu sti gguardate ca facite,
vuje nu vrasiero mpietto mm’appicciate?…

Ve manca la parola e mme parlate,
pare ca senza lacreme chiagnite,
de sta faccella janca anema site,
uocchie belle, uocchie doce, uocchie affatate!…

Vuje ca nziemme li sciure v’arapite
e nzieme cu li sciure ve nzerráte,
sciure de passione mme parite.

Vuje, sentimento de li nnammurate,
mm’avite fatto male e lu sapite…
uocchie de suonno, nire, appassiunate!…

SALVATORE DI GIACOMO

Era de maggio

.

Era de maggio e te cadeano ‘nzino

a schiocche a schiocche li ccerase rosse…

Fresca era ll’aria e tutto lu ciardino

addurava de rose a ciente passe.

Era de maggio — io, no, nun me scordo —

na canzona cantàvamo a ddoje voce:

cchiù tiempo passa e cchiù me n’allicordo,

fresca era ll’aria e la canzona doce.

E diceva. «Core, core!

core mio, luntano vaje;

tu me lasse e io conto ll’ore,

chi sa quanno turnarraje!»

Rispunnev’io: «Turnarraggio

quanno tornano li rrose,

si stu sciore torna a maggio

pure a maggio io stonco cca».

E so’ turnato, e mo, comm’a na vota,

cantammo nzieme lu mutivo antico;

passa lu tiempo e lu munno s’avota,

ma ammore vero, no, nun vota vico.

De te, bellezza mia, m’annamuraje,

si t’allicuorde, nnanze a la funtana:

l’acqua Ilà dinto nun se secca maje.

e ferita d’ammore nun se sana.

Nun se sana; ca sanata

si se fosse, gioia mia,

mmiezo a st’aria mbarzamata

a guardare io nun starria!

E te dico — Core, core!

core mio, turnato io so’:

torna maggio e torna ammore,

fa de me chello che buo’!

.

SALVATORE DI GIACOMO

Nuttata ‘e Natale

Dint’a ‘na grotta scura dormeno ‘e zampugnare:
dormeno, appese a ‘e mura,
e ronfeno, ‘e zampogne
quase abbuffate ancora
‘a ll’urdema nuvena;
e, ghianca, accumparesce e saglie ‘n cielo,
dint’ ‘a chiara nuttata, ‘a luna chiena.
Dormeno: a mezzanotte
cchiù de n’ora ce manca;
e se sparano botte,
s’appicceno bengala,
e se canta e se sona
per tutto ‘o vicenato…
Ma ‘o Bammeniello nun è nato ancora,
e nun s’è apierto ancora ‘o Viscuvato.
Fora, doppo magnato,
esce nfucata, ‘a gente:
ccà d’ ‘o viento gelato,
p’ ‘e fierre d’ ‘a cancella,
trase ‘a furia ogne tanto…
E c’ ‘o viento, e c’ ‘o friddo
ncopp’ ‘a paglia pugnente, a ppare a ppare,
dormeno, stracque e strutte, ‘e zampugnare…

SALVATORE DI GIACOMO

Luna nova

La luna nova ncopp’a lu mare
stenne na fascia d’argiento fino;
dinnt’a la varca nu marenaro
quase s’addorme c’ ’a rezza ’nzino…
Nun durmí, scétete, oje marenà,
votta ’sta rezza, penza a vucà!

Nun durmí, scétete, oi marenà,
votta ’sta rezza, penza a vucà!

Dorme e suspira stu marenaro,
se sta sunnanno la nnammurata…
Zitto e cuieto se sta lu mare,
pure la luna se nc’è ncantata…
Luna d’argiento, lass’ ’o sunnà,
vaselo nfronte, nun ’o scetà…

Luna d’argiento, lass’ ’o sunnà,
vaselo nfronte, nun ’o scetà…

Comme a stu suonno de marenaro
tu duorme, Napule, viate a te!…
Duorme, ma nzuonno lacreme amare
tu chiagne, Napule!… Scétete, scé’!…
Puozze na vota resuscità!…
Scétate, scétete, Napule, Na’!…

Luna d’argiento, lass’ ’o sunnà,
vaselo nfronte, nun ’o scetà…

SALVATORE DI GIACOMO

‘A retirata

Gioia bella.
pe’ te vedé
c’aggio fatto
nun può sapé!

Si putesse parlà stu core,
quanta cose vulesse dì;
ma, chiagnenno pe’ lu dulore,
io m’ ‘o scippo, pè n’ ‘o sentì!

Napule e nenne belle,
addio v’avimm’ ‘a dì…
Sentite ‘a retirata?
Ce n’ avimmo da trasì!

Dice ‘a gente
parlanno ‘e me,
ca si parto
mme scordo ‘e te!

A ‘sta gente stu core mio,
pè risposta tu fà vedè,
e dincello ca, si part’io,
tiene mmano nu pigno ‘e me.

Napule e nenne belle,
addio v’avimm”a dì…
Sentite ‘a retirata?
Ce n ‘ avimmo da trasì!

Gioia bella,
te l’aggi’  ‘a dì
ca dimane
s’ha dda partì!

Statte bona, può sta sicura
c”a medaglia voglio turnà!
A stu core tiénece cura,
si nun torno nun ‘o jettà!

Napule e nenne belle,
addio v’avimm’ ‘a dì…
Sentite ‘a retirata?
Ce n’ avimmo da trasì!

Statte bona, può stà sicura
c’ ‘a medaglia voglio turnà!
A stu core tiènece cura,
si nun torno nun ‘o jettà!

Napule e nenne belle,
addio v’avimm’ ‘a di’?
Sentite ‘a retirata?
Ce n’avimmo da trasì!

SALVATORE DI GIACOMO

Marzo

Marzo: nu poco chiove e n’ato ppoco stracqua
torna a chiovere, schiove, ride ‘o sole cu ll’acqua.
Mo nu cielo celeste, mo n’aria cupa e nera, mo d’’o vierno ‘e tempesta, mo n’aria ‘e Primmavera.

N’ auciello freddigliuso aspetta ch’esce ‘o sole, ncopp’’o tturreno nfuso suspireno ‘e vviole.
Catarì!…Che buo’ cchiù? Ntiénneme, core mio!
Marzo, tu ‘o ssaie, si’ tu, e st’ auciello songo io.

SALVATORE DI GIACOMO

‘A mamma

Chi tene ‘a mamma
è ricche e nun ‘o sape;
chi tene ‘o bbene
è felice e nun ll’apprezza

Pecchè ll’ammore ‘e mamma
è ‘na ricchezza
è comme ‘o mare
ca nun fernesce maje.

Pure ll’omme cchiù triste e malamente
è ancora bbuon si vò bbene ‘a mamma.
‘A mamma tutto te dà,
niente te cerca

E si te vede e’ chiagnere
senza sapè ‘o pecché,
t’abbraccia e te dice:
“Figlio!!!”
E chiagne nsieme a te.

SALVATORE DI GIACOMO

Pianefforte ‘e notte

Nu pianefforte ‘e notte
Sona lontanamente
E ‘a musica se sente
Pe ll’aria suspirà.
E’ ll’una: dorme ‘o vico
Ncopp’a sta nonna nonna
‘e nu mutivo antico
‘e tanto tempo fa.
Dio, quanta stelle cielo!
Che luna! E c’aria doce!
Quanto na bella voce
Vurria sentì cantà!
Ma solitario e lento
More ‘o mutivo antico;
se fa cchiù cupo o vico
dint’a all’oscurità.
Ll’anema mia surtanto
rummane a sta funesta.
Aspetta ancora. E resta,
ncantannose, a penzà.

SALVATORE DI GIACOMO

Marechiare

Quanno sponta la luna a Marechiare
pure li pisce nce fann’ a l’ammore,
se revotano l’onne de lu mare,
pe la priezza cagneno culore
quanno sponta la luna a Marechiare.

A Marechiare nce sta na fenesta,
pe’ la passione mia nce tuzzulea,
nu carofano adora int’a na testa,
passa l’acqua pe sotto e murmuléa,
A Marechiare nce sta na fenesta
Ah! Ah!
A Marechiare, a Marechiare,
nce sta na fenesta.

Chi dice ca li stelle so lucente
nun sape l’uocchie ca tu tiene nfronte.
Sti doje stelle li saccio io sulamente.
dint’a lu core ne tengo li ponte.
Chi dice ca li stelle so lucente?

Scetate, Carulì, ca l’aria è doce.
quanno maie tanto tiempo aggio aspettato?
P’accompagnà li suone cu la voce
stasera na chitarra aggio portato.
Scetate, Carulì, ca l’aria è doce.
Ah! Ah!
O scetate, o scetate,
scetate, Carulì, ca l’area è doce.

SALVATORE DI GIACOMO